Test zu Deru: The Art of Cooperation - Nintendo Switch

Achtung: Der folgende Test verlässt die typischen ntower-Pfade und wird euch vollständig auf Schwiizerdütsch präsentiert. Doch keine Sorge, falls ihr dieses Dialektes nicht mächtig seid: Hier wird Hochdeutsch gesprochen.

Es isch e Kunst z‘kooperiere – zumindest, wenn‘s e gueti und erfolgrichi Kooperation söll sii. Mer muess sini eigene Idee und Gedanke ibringe, aber genauso au d‘Meinige vom Partner berücksichtige und gmeinsam zu eme Ergebnis cho, mit dem alli Beteiligte zfriede sind. Wichtig isch Kooperation sehr hüfig i de Bruefswelt. So hend d‘Entwickler vo de INK KIT Studios sicherlich sehr produktiv zemegarbeitet, zum ihres erste Spiel uf de Markt bringe. Wie de Titel scho seit müend au d‘Spieler kooperiere, um erfolgriich z‘sii – es heisst nämlich Deru: The Art of Cooperation. INK KIT isch i de Schwiiz beheimatet und laht‘s sich nöd neh, nebe de dütsche und englische Sprach au de Dialekt „Schwiizerdütsch“ is Spiel z‘integriere. „Was die chönd, chan ntower scho lang“, han ich mir denkt und bin e Kooperation mit oisem treue Leser Daniel iigange, wo ebefalls us de Schwiiz chunt und dä Test für oi übersetzt het.

Optional derfet ihr oi de Menütext in Schwiizerdütsch azeige lah – genauso wie de Test!

Eigentlich isch die ungwöhnlich Sprachuswahl – sowohl im Spiel als au bi ntower – am eheste als chline Spass und Liebeserchlärig a Heimatland und Dialekt z‘verstah. Wichtig für Deru: The Art of Cooperation isch Sprach nämlich nöd. S‘Spielprinzip isch so eifach gstaltet, dass ihr‘s sehr schnell nach churzem Usprobiere verstah werdet. Darum verzichtet d‘Hersteller au eifach uf jedi Form vo Ifüehrig oder Tutorial – vo enere Story ganz z‘schweige – und lönd oi direkt mit de erste Level entdecke, was eigentlich z’tue isch. Dezue isch znöchst z‘säge, dass Deru im Chern es Spiel für zwei Spieler isch, wo (natürlich) kooperiere müend, um gmeinsam das Ziel z‘erreiche. Trotzdem isch es au möglich, allei sis Gschick uf d‘Prob z‘stelle, was aber je nach Level sehr schwierig werde chan. Doch dezu spöter meh. Wie funktioniert Deru?

Uf em Bildschirm gsehnd ihr zwei chlini Figure, wo vo oi gstürt werdet Optisch erinneret das Ganze a abstrakti Kunst, wo us eifache geometrische Forme bestaht. Jedefalls hend beidi Figure verschiedeni Farbe – eini isch schwarz, die anderi wiiss. Entsprechend git‘s au es schwarzes und es wiisses Ziel-Feld. Hend‘s die beide erreicht, isch s‘Level gschafft. Defür beweget ihr oi eifach per Analog-Stick vora, wiiteri Stürbefehl werdet nöd benötigt. So wiit, so eifach. D‘Herusforderig liit drin, a Hindernis verbiizcho, wo zwüsche oi und de Ziel stönd. Die Hindernis sind ebefalls schwarz oder wiiss und hend ganz entscheidendi Eigeschafte: Chunt e wiissi Figur mit eme wiisse Hindernis in Berüehrig, wird‘s in Sekundebruchteil ufglöst und verschwindet. Demit sind ihr gschiiteret und müend‘s erneut versueche. Nur ganz churze Kontakt, wo d‘Figur schrumpfe laht, chönd ihr mit e chli Glück überstah.

Hindernis vo de eine Farbe sind tödlich, die vo de andere Farbe chönd ihr blockiere, um de Weg für eure Partner freizmache.

Keis Problem und sogar wichtig isch degege de Kontakt mit de Hindernis vo de jewils andere Farb. Trifft di wiiss Figur also uf es schwarzes Hindernis, chan ihre nüt passiere. Im Gegeteil: Sie macht demit sogar de Weg frei für die schwarzi Figur. Ihr chönd oi die Hindernis wie Flüss vorstelle, wo permanent ihre vorgebene Weg entlangflüsset. Chrüzt jetzt d‘Spielfigur de Weg vom Hindernis, isch es so, als würd en Staudamm de Fluss vom Wasser stoppe. Hinter de Figur isch jetzt also de Weg frei für die zweiti Figur, wo jetzt sicher uf die anderi Siite vom „Fluss“ chan gah. Det wartet vilicht es Hindernis vo de andere Farb. Da chan sich also d‘Figur, wo vorher vo de Hilf vom Partner profitiert het, revanchiere und ebefalls de wiiteri Weg freimache.

In Deru gaht‘s also um Gschicklichkeit, Präzision, Timing und Kooperation. Bim Spiel mit Partner isch es wichtig, sich immer wieder abzspreche, um die richtigi Weg z‘finde, ufenander ufzpasse und zur rechte Ziit am rechte Ort z‘sii. Das Konzept gaht uf und macht Spass, wil‘s eifach es tolls Gfühl isch, die verschiedene Herusforderige mit Teamwork z‘meistere. De Schwierigkeitsgrad variiert debii, au abhängig vo de Qualität vo euere Zemearbeit. Die erste Ufgabe sind no eifach z‘löse und chönd mit Rueh und gueter Planig problemlos bewältigt werde. Schwieriger wird‘s, wenn‘s meh Hindernis und weniger Platz zwüsche ihne git. Die größti Herusforderig isch es aber, wenn ihr die verschiedene Abschnitt nöd in Rueh nachenander passiere chönd, sondern gliichzitig und präzis handle müend. Spötistens da wird‘s für Einzelspieler extrem schwierig. Ihr stüret nämlich beidi Figure mit de beide Analog-Sticks gliichzitig. Wenn ihr denn die eini Figur sehr präzis in e sicheri Ecke stüre müend, während ihr gliichzitig auch die zweiti schnell in Sicherheit bringen müend, wil sich durch‘s Wegbewege vo de erste Figur de gföhrlichi Hindernisfluss wieder ufbaut, denn isch das Ganze
üsserst herusfordernd.

Wenn beidi Figure gliichzitig handle müend, wird‘s für Einzelspieler sehr schwer.

Insgesamt chan mer de Einspieler-Modus au so verstah: als grossi Herusforderig. Liechteri Level, bi dene mer d‘Figure mit Rueh und Überlegig nachenander fortbewege chan, ermöglichet no en durchus machbare Iistieg. De Sprung vom Schwierigkeitsgrad bi schwerere Level, wo s‘gliichzitige Bewege vo de Figure erforderet, isch aber sehr starch. Insofern chan ich Deru allgemein nöd für Einzelspieler empfehle, wo kei Lust uf s‘gmeinsame Spiel mit Fründe oder Familie hend – es sei denn, sie hend grosse Spass a derartige Herusforderige. Wer aber sowieso gern s‘zweite spielt und das Ganze am liebste gmeinsam und nöd gegenenand, de isch da vilicht a de genau richtige Adresse.

S‘Spiel weiss i sim Chern, also dem, was es sii will und wodurch es überzüge will, z‘überzüge und z‘unterhalte. Drüber use sötet ihr kei grossi Erwartige ha, zumal mir‘s mit eme typische, chline Indie-Titel z‘tue hend. Es git kei zahlrichi unterschiedlichi Modi, ihr spielet grundsätzlich lokal und ohni Online-Funktione und de abstrakti Grafik-Stil isch zweckmässig, nöd begeisternd oder wunderschön. Musikalisch werdet ois dezenti, ruhigi Hintergrundkläng bote. Dezue chömet e Handvoll Soundeffekt, wo s‘Verbiiflüsse vo de Hindernis untermalet. Somit bechömet mir unterem Strich Durchschnittswaar us em Nintendo eShop bote, wo ich aber trotzdem für kooperationswilligi Spieler, wo en chliine schwiizer Entwickler möchtet unterstütze, wärmstens empfehle chan.